تنضيف البشرة والجسم في المنزل

تنضيف البشرة والجسم في المنزل

اولا فوائد تنضيف البشره والجسم

·        اعرفي انك لو نضفتي بشرتك كويس كل اسبوع هتتخلصي من معظم مشاكل البشره اللي بتقابلك طول الاسبوع (اسمرار البشره نتيجه الشمس او تراكم الخلايا الميته وبالتالي هنتخلص من الاتربه والاوساخ اللي بتسبب الحبوب والبثور السودا وتسيب بشرتك نضيفه وناعمه تماما)

·        ثاني حاجه معظم خطوات العنايه بالبشره بتتمثل في خطوات التنضيف -لو اتعلمتيها كويس يبقي عرفتي خطوات العنايه بالبشره مع اخيرا خطوة الترطيب وانتهينا -وده اللي بيتعمل في الكوافير بالظبط

·        قبل مانبدء في الخطوات نغسل بشرتنا بصابونه كويسه او غسول مناسب لنوع بشرتك

·        خطوات تنضيف البشره والجسم بسيطه بتتمثل في 3 خطوات

• فتح المسام _ سنفرة البشره او الجسم _ غلق المسام _ استخدام كريم مرطب

الخطوة الاولي اولا فتح المسام

·        فتح المسام بيكون عن طريق تعريض البشره للبخار عن طريق حمام البخار او الجسم عن طريق الساونا  (الاجهزة دي بتكون موجوده في محلات الكوافير )

·        لو انتي في البيت بقي ...بنجيب حلة نمليها مية سخنه ونغليها ونحط معاها ملح اثناء الغليان وتحطي فوطه وتتركي مخرج صغير عشان تعرفي تتنفسي وتعرضي بشرتك للبخار 5 دقايق

·        للجسم بقي ..نملي بانيو او حتي نفتح ميه سخنه علي جسمنا علي قدر استحملنا خمس دقايق بالظبط

·        وننشف جسمنا بطبطبه بعدها عشان نهييء بشرتنا او جسمنا للخطوة اللي بعدها

الخطوة التانيه سنفرة البشرة والجسم

·        طبعا ممكن تشتري سنفرة جاهزة او جيل مقشر وتحطيها ربع ساعه وتفركي بشرتك ودي بسيطه

• او السنفره بالمواد الطبيعيه اللي انا بفضلها لانها بتغزي وترطب معاها وتخلي بشرتك بلون وردي مع النضافه

السنفرة بالمواد الطبيعيه

·        بإستخدام الطمي المغربي او الترمس المطحون او الحمص المطحون او ملح الجسم (ملح الحليب )

·        بنخلطهم بماء ورد وزبادي او لبن ومعلقة صغيره ليمون كلهم بمقادير بسيطه .

لكن ملح الحليب بنستخدم معاه زيت زيتون وبيستخدم لبشرة الجسم فقط لانه قوي

·        نتركه حوالي نص ساعه علي البشرة او الجسم ثم نفركه كويس جدا

·        ممكن تكرري خطوة السنفرة اكتر من مرة لو لقيتي بشرتك لسه ماانضفتش _والاهم تكون بشرتك مش حساسه

الخطوة التالته غلق المسام

·        بإستخدام تونيك او قطعة تلج تمرريها علي بشرتك

·        لو جسمك افتحي ماء بارد علي جسمك لغلق المسام

·        بعديها تنشفي بشرتك بالفوطه عشان الخطوة الاخيره

ترطيـــــــــب البشره

·        بكريم مناسب لنوع بشرتك او كريم للجسم او لوشن

·        او لتعطير الجسم للعروسات ..استخدمي فازلين واخلطيه بزيت معطر (زيت الورد _زيت الفل .....)

·        اعمليها كل اسبوع وهتلاقي نفسك عروسة جديده بالنسبه للمتزوجات _ولو عروسة وبتهتمي بنفسك ده اساسي كل اسبوع قبلها بشهر تقريبا مع العنايه اليوميه .

ملحوظه مهمه لنجاح عملية التنضيف

مااتشطفيش شعرك قبل السنفرة من الكريم او الزيوت عشان الجسم ياخد مفعوله من الماسك وينضف كويس

ويكون جسمك ناشف او مندي شويه بس